Mungmyit Sinli Ga, Namhpakka Mare Daw (3) kaw shanu nga ai Salang Lashi Je Naw hpe Balawng hpyenla ni kawn Balawng Bum de July 21 ya shana woi mat wa nna adup zingri ai lam na chye lu ai.
Salang Lashi Je Naw hpe dum nta kaw nna shana hkying 8:00 daram hta myit pat woi mat wa ai rai nna Balawng Bum kaw du ai shaloi ka-ni dut sha ai ngu mara shagun nna adup zingri ai lam chye lu ai.
Balawng hpyenla ni kaw nna Salang Lashi Je Naw a nta masha ni hpe gumhpraw sen 30 hte sa shaw la na matu shana wa ai rai nna, n sa shaw la yang sat kau na nga nna jahkrit shageng ai majaw mare salang ni lapran shang ai hte sen 27 jaw nna sa shaw la sai lam mare masha ni kaw nna chye lu ai.
Ndai laman Mungmyit Sinli Ga e shanu nga ai buga mare masha ni hpe Balawng hpyenla ni kaw nna lam amyu myu tam let jahkrit shageng ai hte zingri ai lam ni law wa ai majaw buga masha ni nga yak wa ai lam na chye lu ai.