Balawng hpyenla lahkawng dum nta kata shang nna nta madu ni hpe adup abyen

Kuthkai Ginwang, Ga Leng Mare na Slg. Lashi Labya La San hte ningrum ningtau jan hpe shanhte a dum nta kata kaw nga taw ai ten July 26 ya shana yup tung daram hta Balawng hpyenla marai lahkawng pat jasan galaw ai nga nna nta kata de ma ja htim shang wa n-htawm adup gayet kau da ai lam na chye lu ai.

Balawng hpyenla lahkawng gaw kani nanghpam pat jasan galaw ai nga nna Slg. Lashi Labya La San a dum nta kata shang sawk tam ai hta hpa n mu ai majaw Slg. La San hpe jahkrit shama, adup gayet ai hte shapyi bye ai sha n-ga, gawk kata kaw yup nga ai ningrum ningtau jan ma kanu hpe mung lahtum kau da ai lam chye lu ai.

“Kani nanghpam pat jasan galaw ai nga tim aten masat nna galaw ai lam n nga ai sha shanhte kam ai shaloi shang jep ai. Hpa n mu yang kam ai hku adup abyen kau da ai re. Grai myit n pyaw ai. Htawm hpang de mung ndai zawn re ai mabyin gaw mungmasha ni kadai kaw mung n du u ga. Grai n tara ai lam re majaw atsawm lit la hparan ya na hpe ra sharawng ai,” nga nna Slg. Lashi Labya La San tsun dan ai.

Slg. Lashi Labya La San gaw ma lahkawng a kawa rai nna, buga hpung magam bungli hta mung shang lawm shakut nga ai re. Ya aten adup abyen hkrum ai lam hte seng nna lit nga ai salang ni kaw nna atsawm hparan ya na matu amyu shayi ni hku nna mung, Kuthkai buga hku nna mung gara ladat hte matut hparan sa wa na ngu ai lam ni hpe bawngban jahkrup nga ma ai lam na chye lu ai.