Ja htu sha ai majaw hkawmsa hkawmwa lam ni htenza

Hka Hku Mung kata na Salang Yang Hpyen-yen Dabang makau mayan, Salang Hka kaw ja htu sha ai majaw dai mayan na hpyen-yen mung masha ni a hkawmsa hkawmwa lam ni hten za wa nga ai lam na chye lu ai.

Hpyen-yen dabang makau mayan kaw ja htu sha ai ni gaw kaga ginra hkan na sut hpaga galaw sha ai lauban ni rai nna, ya na zawn ja htu sha ai majaw Salang Yang hpyen-yen mung masha ni hkawm sa na lam ni htenza wa ai sha n-ga, dabang hte ni ai re majaw ja htu n-hkun hkan ma ni hkrat bang ai lam ni byin wa na hpe mung mung masha ni myit tsang nga ma ai re.

Salang Yang Hpyen-yen Dabang kaw lai wa sai June shata du hkra gaw malu masha garum ningtum lam ni naw lu ai re. Raitim ya lanam ten hta gaw hka kaba nna hkrunlam yakhkak ai sha n-ga, matut mahkai mung yak ai majaw kaga ginra na garum ningtum sa jaw na matu n loi la ai re. Garum ningtum lam nau n lu du sai majaw hpyen-yen dabang na mung masha ni tinang chye ai hku tam lu tam sha let nga nga ma ai lam, ya aten hpyen-yen dabang kata ma kaji ni tukkwi machyi ai lam ni mung nga ai lam mung na chye lu ai.

Hka Hku Mung, Hkrang Hku Ginra, Dari Yang Mare makau kaw mung jak kaba hte ja htu sha nga ai majaw dai ginra masha ni gaw mare htenza wa na hpe myit tsang nga ma ai re. Ya na zawn mare makau hkan ja htu sha ai lam ni hte seng nna manghkang law law byin wa mai ai majaw seng ang ai mare uphkang salang ni hku nna hparan ya na hpe ginra masha ni ra sharawng nga ma ai re.