Hpawmyi langai hkam bawm kabye kapaw hkrum

Chihpwi, Kanpai Yang lawk hte deng 2 daram tsan ai shara kaw July 27 ya shani hkam bawm kabye kapaw la nna Chihpwi KBC Jawngwang Lawk hta shanu nga ai Jan Lum Naw (asak-42 ning) hkala hkrum mat ai lam na chye lu ai.

Jan Lum Naw gaw Chihpwi Buga Hpung na hpungtau langai hte bungli hte seng nna Kanpai Yang maga de sa wa ai lam kaw hkam bawm kabye kapaw la ai re lam buga masha langai tsun dan ai.

Hkam bawm a majaw Jan Lum Naw a lagaw pai maga lahpan ashin mat nna hkra maga lagaw bawm hkyep hkra la ai. Hkala hkrum ai hpang Chyihpwi Mungshawa Tsirung de shawng sa ai raitim ningma hkala sawng nna ya aten Myitkyina Tsirung hta tsi tsi hkam la nga ai lam matut chye lu ai.

“Shi ya gaw Myitkyina Tsirung kaw re, lagaw lahpan nan malawng mat ai majaw ningma gaw loi sawng ai, mana na ai gaw lagaw maga mi daw kau ra sai nga na ai,” nga nna mare masha langai tsun dan ai.

Jan Lum Naw a madu wa gaw lai wa sai shata 3 hta sha n nga mat sai rai nna kasha marai 4 hpe bau maka nga ai kanu re majaw ya na zawn byin hkrum ai a ntsa buga masha ni grai myit n pyaw nga ma ai re.

Ndai hkam bawm gaw kadai gara wuhpung ni hkam da ai hpe tup hkrak n chye lu shi ai. Mare uphkang salang ni kaw nna gaw dai makau grupyin na nam de shang ai lam n galaw na matu ndau da ai lam ni nga ai re lam chye lu ai.