Covid-19 ana ladaw hta dinghku kata amyu shayi ni hpe mazut roirip ai manghkang gaw Jinghpaw Mung kata sha n-ga mungdan ting madang lani hte lani grau law jat wa ai lam na chye lu ai.
Ya na zawn byin ai lam gaw Covid-19 ladaw hta shinggan de bungli tam sha yak ai, tam lu tam sha yak wa ai, shinggan bungli masan n sa ai lam ni hpe dinghku kata manghkang shabyin ai lam law wa ai majaw re. Dinghku num ni hpe marawn pawt ai, lagaw lata du adup zingri ai, tara upadi ka-up ai lam n nga ai lam ni a majaw dinghku kata kanu num ni ahkaw ahkang tawt lai hkrum ai lam law wa ai re hpe chye lu ai.
“Ya na zawn dinghku kata num ni hpe mazut roirip ai manghkang tawt lai ai ni hpe ahkyak la ngu tim shanhte tawt lai shut shai ai ni nan tara upadi ngu hpe n chye na ai lam, shut tim shut ai re hpe n chye ai lam, dinghku num mi rai rai dinghku la mi rai rai dinghku kata manghkang byin wa yang lata du ai lam ni byin wa ai,” nga nna Htoi Gender And Development Foundation kaw na Saranum Nang Pu tsun dan ai.
Ndai zawn dinghku kata num ni hpe mazut roirip ai manghkang ni yawm wa lu na matu mungshawa ni kaw nna dinghku kata yakhkak wa ai ten shada ta du nna pawt ai lam n galaw na, tara upadi hpe hkan nang hkan sa na, tara tawt lai shut shai ai ni hpe tara upadi hte hkrak ahkyak la na lam ni galaw sa wa ra ai hpe hpaji jaw da ma ai.