KLN: Myen Hpyendap gaw April 11 kawn hpang nna Sinna ginwang de laja lana bai htim gasat lai wa sai. Hpa majaw ndai zawn htim gasat wa ai ngu maram lu ai kun?
Dkb Nhpang Naw Bu: Myen ni laja lana htim gasat wa ai gaw:
(1). Lamu ga madu mayu ai (နယ္ေျမ စိုး မွဴးေရး). Ya shanhte gasat nga ai Ba (2) HQ ginra, Dung (14), Dung (11) ginra ni gaw, Miwa a OBOR lam ang ai ginra ni mung re. Miwa hte bungli galaw lu na matu lamu ga madu ra ai.
(2). KIO a shang gumhpraw pat hkum mayu ai.
(3). KIO hpe madi shadaw nga ai mungshawa hte jahka kau mayu ai.
Ndai ni madung rai na re ngu maram ya nngai.
KLN: Ya ten hta Dap Ba (2) ginra Awnglawt grupyin na hpyen masa hte hpyen koi-yen nga ai mung mare masha ni a lam gara hku rai kun?
Dkb Nhpang Naw Bu: Ba (2) Awnglawt ginra de na sat lawat gaw:
(1). Majan matut laja nga ai masa re. Myen hpyendap ni shamu tim, KIA shamu tim, gasat gala gaw aten tup byin mai ai majaw gasat gala ginra tai mat sai.
(2). Mung shawa (2000) jan hpyen yen jam jau nga ai. Nkau mi Danai myu de chyat rawng ai, nkau mi nam de chyat rawng ai, Myen asuya hpyendap ni tsun ai buga de bai wa lu sai ngu tim Myen hpyendap ni nga ai majaw n wa gwi ai, san jep shatsang ai. KIA nga ai de lam madun shangun, majan pa de lam shawng hkawm shangun na tsang ai. Apirl 23 ya shani sha mung Awnglawt hpyen-yen masha marai 2 hpe gap sat nna, 3 hkala hkrum, 2 mat ai lam na lu ai.
(3). IDP ni malu masha tsi mawan nga shara grai yak hkak nga ai, pru hkawm nmai mat ai.
KLN: Kasung hte Zup Mai na mungshawa law malawng gaw Namti Lambraw Yang de du sai lam na lu ai. Ya ten hta Dung (11) grupyin na hpyen masa gara hku rai kun?
Dkb Nhpang Naw Bu: Dung (11) ginra mung hpyen masa grai laja nga ai. Mungshawa nkau mi Namti Lambraw Yang, nkau mi Namjim Myitkyina de pru wa ai. Buga de bai wa n gwi nga ai. Malu masha yak ai, yi sun dum nta yawng kabai kau ra mat ai.
KLN: Dung (26) ginra de ya ten laja lana gasat gala naw rai nga ai kun? Lai Nawng Hku na mung mare masha ni hpe Myen hpyendap kawn hkang zing da ai lam mung na lu ai. Ya ten dai hkang zing da hkrum ai mungshawa ni gara hku rai nga ma ai kun?
Dkb Nhpang Naw Bu: Dung (26) ginra hpyen masa laja nga ai. Lai Nawng Hku mungshawa nkau pru lu ai raitim nkau mi hpe n dat ya ai. Myen hpyenla ni hte rau woi nga, masha ninggang shatai ai masa pru ai, matut mahkai nlu mat ai, phone ni yawng mung zing kau ya ma ai. Nawng Nang chyum jawng ma tatut shang ai sara/num (3) lawm ai lam na lu ai. Sa woi la na jahkrup tim Kamai ဗ်ဴဟာမွဴး ahkang n jaw ai lam tsun ai.
KLN: Ndai laman Ginjaw ginra de Myen hpyendap kawn grau n-gun jat nga ai lam mung na lu ai. Ya ten Ginjaw ginra na hpyen masa gara hku rai nga ai kun?
Dkb Nhpang Naw Bu: Ya ten Ginjaw ginra na sat lawat gaw:
(1). Sinat kaba 60, 80, 81, 120, 105, 107 mm ngu maram lu ai laknak kaba ni hte dingyang gap shatsang nga ai. 2017 ning December 24 ya shana gap ai laknak kaba Laiza Woi Chyai IDPs camp makau kaw hkrat nna ap nawng jawng saranum (1) hkala lai wa sai. 2018 ning April 11 ya Laiza grupyin Ba (5), Ba (3), Laisin yawng ngu na de gap bun ai. Laiza Lawa Yang mare kaw langu hpai ai mungshawa langai si nna langai hkala lai wa sai. April 12 ya shani mung Laiza, Mai Ja yang – Ba (5) ginra, Dap Nawng Daju ginra ni de laknak kaba gap bun ai. April 15 ya laban shani, Laiza grupyin de gap bun ai. April 20 ya shani Ba (3), Ba (5), Laiza, Laisin, Hpalap ginra ni de gap bun ai. Kalang gap yang shara mi hta (20) lang lahta, shara yawng rai yang (50) lang lahta gap ma ai.
(2). April 23 ya kaw nna, Ginjaw ginra, Sadung ginra ni de hpyen n-gun laklai jat ma ai. 24 ya shani hta pyi hpyenla htaw mawdaw (50) jan sai. Sadung lam maga mawdaw (30) jan, n-gun jat jahkrat da ai. Laknak kaba, သံခ်ပ္ကာကား ni, Gumra ni lawm ai. Ba (1) ginra Nmai Wa Lawng de Gwi Htau Daru hta 24 ya shana mawdaw (20) rap mat wa ai. Chihpwi lam de mung mawdaw hte lung wa ai. Sumprabum lam maga mare masha ni hpe gara de n pru na matu Myen ni tsun da ai lam na lu ai. Ba (1) ginra de mung htu na masa nga ai. Ginjaw ginra, Sadung, Ba (7), Ba (1) ginra ni de hpyen majan laja wa na masa nga ai ngu maram lu ai.
KLN: Ndai zawn Myen hpyendap gaw hpyen n-gun hte la ba ka-up nna, shamyit masing hte matut sa wa yang gaw bawngban ai hte mungmasa mahtai lu tam lu na kun?
Dkb Nhpang Naw Bu: Myen hte bawngban nna mungmasa mahtai lu yak na re ngu mu lu ai. Grau nna shanhte ra ai lamu ga ni (နယ္ေျမစိုးမိုးေရး) n madu lu dingsa, bawngban ai lam mung n hkap la na re ngu maram lu ai.
KLN: Ginra buga shara shagu hkan chyam bra nga ai Wunpawng myu sha ni hpe kaga numhtet ga tsun mayu ai kun?
Dkb Nhpang Naw Bu: Buga mungshawa ni hpe tsun mayu ai gaw, anhte ra ai Shanglawt, anhte ra ai mung masa ahkaw ahkang ni gaw aloi ali sha lu na yak ai re majaw mungmasa, hpyen masa mayak law law lai di ra na ga ai. Dai ten myit daw myit hten n rai ga. Yak hkak jam jau ai hpe hkamjan ra na re. Shada myit hkrum kahkyin gumdin lam hpe grau n-gun dat ga. IDP ni hpe hkye na lam, karum na lam, ni hta yawng shanglawm ga. IDP mungshawa ni mung mungdan lu mayu ai myit, jet ai simsa lam lu mayu ai myit hte hkam sharang ga ngu n-gun jaw mayu ai.