Mung Shawa Hpe Masha N-gang Matut Galaw Nga

Hugawng Ginwang, Nam Gawn lam Samak gate kawn February 6 ya shani shalai shapraw dat ai mungshawa yawng cycle hte hpawn marai (120) re lam chye lu ai. Ya ten hta dai ginra hta naw pat hkum tawn hkrum ai mungshawa yawng marai (800) daram naw nga ai lam buga masha ni shana wa ai.

Ya ten Samak gate kaw du nga ai pat maw na pru wa ai mungshawa ni hta Wunpawng myusha ni grau law ai lam mung chye lu ai.

February 4 ya shani Nam Gawn Zup kaw Lauban Zaw Mu lit la nna sa karum ai malu masha ni hpe Samak gate kaw nga ai Myen hpyendap ni gaw shanhte hpe shawng sa jaw shangun nna she matut shalai jaw ya ai. Myen hpyendap kawn mung shawa ni hpe matut shalai jaw ai hta mung shawa law malawng sa jaw ai malu masha n lu la ai nga nna tsun ai. Mung mare masha ni gaw tinang kaw lawm gun ai n-gu ni shadu sha nna nga nga ma ai lam buga masha ni kawn chye lu ai.

Hpyen hprawng ai ni hte Samak kaw nga ai Myen hpyendap ni kawn Slg. Dashi Tang Gun a dumsu (14) hpe sat sha kau ya ai lam na lu ai.

Bai nna, Nam Gawn Zup kaw ka-ni hpraw hte yama hpe kam ai hku wang lu wang lang rai nna Danai kawn sa dut jaw nga ai lam mung na chye lu ai.

Ya ten Myen hpyendap gaw mung shawa ni hpe n-gang shatai tawn nhtawm Nam Gawn ja maw, Awng Ba, Noi Je Bum pat maw ni hta shanhte shara la ngut ai hpang she mung shawa mahkra hpe dat ya na re nga nna buga masha ni tsun ai.Mung shawa yawng hpe ya jang dat kau yang shanhte shim lam n lu wa na hte malu masha rung rai ni shalai ai hta yak hkak dingbai dingna byin wa mai ai lam ni nga ai majaw mung shawa hpe n-gang hku nna matut shatai nga ai hpe mung chye lu ai.

Lai wa sai February 5 ya shani Myitkyina manau wang kaw, WMR, Myusha Zinlum Hpung, CSOs, hte makam masham hpung ni woi awn nna, Hugawng ginwang kata hpyen majan a majaw Myen hpyendap ni kawn pat shingdang tawn hkrum ai mung shawa ni hpe lawan shalai shapraw ya na matu mung shawa (3000) jan n-gun madun lamang galaw lai wa sai.