Munggu Sara Yen Hpe Htawng Dam Jahkarat Ai Lam Gaw Amyu Sha Ting Hpe Jahkrit Dat Ai Lam Re Nga Nna KBC Amu Madu Kaba Tsun

Munggu buga na hpung tau Dumdaw Nawng Lat hte  Sara Lang Jaw Gam Seng yen hpe htawng dam jahkrat ai lam gaw Myen hpyen Dap a n tara ai lamni hpe tsun yang htawng dam mai jahkrat ai ngu lachyum hku nna Amyu Sha ni hpe jahkrit dat ai lamre nga nna KBC Amu Madu kaba kawn tsun dat ai re hpe chye lu ai.

Hpung tau Dumdaw Nawng Lat hte sara Lang Jaw Gam Seng yen hpe Pukma (3) hte  tara jewat nna htawng dam shaning kaba hku jahkrat dat ai lam gaw Amyu Sha ni hpe jahkrit shama ai lam galaw dat ai lachyum re nga nna KBC Amu madu kaba Rev.Dr. Hkalam Sam Son tsun ai re lam chye lu ai.

Myen hpyen Dap kaw na Bomu Kyaw Zin Htun kawn tara shawk shawn nna Hpung tau Dundaw Nawng Lat hpe gaw Pukma (3) hte  htawng dam (4) ning shata (3) jahkrat ai rai nna, sara Lang Jaw Gam Seng hpe gaw Pukma (2) hte htawng dam (2) ning e shata (3) jahkrat dat sai re lam hpe chye lu ai.

Sara yen hpe 2016 ning December shata byin ai Munggu majan hta Myen hpyen Dap kaw nna shinggyin ahkaw ahkang tawt lai ai lam ni hpe shi sawk ni hpe tsun dan, lam madun hkawm ai shaloi Myen hpyen Dap kawn rim woi mat ai re hpe chye lu ai.

Ya na zawn mara kata rim woi mat nna htawng dam jahkrat ai lam gaw nbyin gying ai lam hte jaw ai teng mang ai lam hpe tsun shaga ai masha ni hpe rim nna htawng dam jahkrat ai lam gaw mung masha ni hpe jahkrit shama ai lam byin shangun ai majaw Sara yen hpe lawan ai hku nna bai dat ya na matu Human Right Watch (HRW) hte Fornify Right Hpung ni kawn n dau laika shale hpyi shawn da ai lam hpe chye lu ai.