Kachin Sub – State Ginra, Kawng Jung Bum lagaw kaw, October 19, 4:00pm-5:00pm aten laman, Myen asuya hpyen dap Hk.M.Y (419) dap na hpyen hpung ni hte KIA hpyen hpung ni gasat poi byin ai shaloi Myen hpyen hpung ni gap ai sinat laknak kaba si ni, Mungshawa ni a dum nta sun wang ni hta hkrat kapaw ai lam chye lu ai.
Sinat laknak kaba si hkrat kapaw ai shara ni gaw, Hu Hpyet mare na Slg. Lamai Yaw a dum nta sun wang kaw (1), gawdin pa kaw (2) hkrat kapaw ai. Nawku Jawng wang kaw nna Bazuga hte kalang bai matut gap bang ai raitim sinat laknak kaba si hkrat kapaw nna Mungshawa ni hta hkala nba hkrum hkra ai lam gaw n nga ai hpe chye lu ai.
Bai nna, Kachin Sub – State Ginra, Man Mawk Bum maga kaw nna lung wa ai, dap mying n chye ai Myen hpyen n’gun (200) daram nga ai hpung ni hte KIA Masat (34) Dap Dung kata na, Kung (1) hpyen hpung ni, October 19, 6:30am-7:30am laman, gasat gala majan byin ai lam hpe hpyen shisawk ni kaw na chye lu ai.