KIA Masat (3) Dap Ba, Masat (27) Dap Dung ginra, Mung Hkawng makau Laika Zup Ja mare de, September (18) ya shani, Hk.L.Y (86) hte Hk.M.Y (318) pawng hpawm hpyen ni htim lung wa ai majaw, gasat gala byin ai kaw nna, October (6) ya shani du hkra, Kapawk galawk rai matut manoi gasat gala byin nga ai.
KIA Dung (1) ginra, Manje grupyin, Lung Ja Post, Kai Htik mawdaw lam, Chyaw Hkawng, Ninghtawn Kawng hte Dung (12) ginra, Nam Hkan, Nam Lim Pa, Dung (27) ginra, Je Sawn, Lahtaw Bum, Hka U re ai ginra ni hta majan byin nga ai.
Dai ginra hta chyinglau rawng nga ai Myen hpyen dap ni gaw, Hk.L.Y (86), Hk.M.Y (318), Hk.L.Y (48, 276) pawng hpawm dap Hk.L.Y (121), Hk.M.Y (438, 601) pawng hpawm dap ni re. Myen hpyen dap ni tsun ai majan byin ai ningpawt gaw, KIA ni bawm laknak kaba hte mare de gap sharu bun, mara kata mung shawa ni hpe, rim zingri re ai majaw, mung shawa ni galaw lu galaw sha, shim lum lam n nga ai hpe makawp maga ya na matu, mungshawa ni garum hpyi ai majaw, September (26) ya shani kaw nna gasat gala byin ai re lam, Myawaddy shiga hta ndau shana shabra ma ai.
Bai, September (13) ya shani Manje Han Htet mare kaw seng dut nga ai, Myen Sam Num Daw Sein Tin hte Jinghpaw Num Jan. Lazing Hkawn Hpang yan hpe, Ka-ni Nanghpam dut shabra ai majaw, sharin shaga na matu woi la ai hpe Tatmadaw ni a shiga jaw masha re ngu KIA ni rim la nna zing ri ma ai ngu, tsun shabra wa ai. Daw Sein Tin gaw Yama dut sha ai lam shi nan hkam la ai hta n-ga Yama dut ngam tawng 17 sakse rai hte hpawn lu rim ai re. Pat Jasan Komiti ni shi hpe hpaji jaw (awareness) galaw nga ding yang re. Shi a manang Lazing Hkawn Hpang mung ka-ni dut shabra ai majaw rim ai she re. Ya na zawn n teng n man ai shiga shabra, mara shagun ai hpe maram yu yang Daw Sein Tin gaw Myen hpyenla langai ngai a, ni nawn ai masha rai na masa nga ai ngu maram lu ai.
Bai, Mung Hkawng hte Manje lapran Tatmadaw hpe KIA ni bawm majan gasat ai hta, mungshawa 3 si 2 hkala ai ngu mara shagun ai, dai ten dai ginra hta majan ginra rai nga ai majaw gasat gala dingyang byin ai re. Gasat poi byin ai shara mare shinggan lam lapran hta re. Madung gaw Myen dap ni mungshawa hpe, Porter woi hkawm ai majaw mara kata mungshawa ni si lawm shangun ai. Mungshawa ni hpe lam woi madun ngu masu nna, bawm kabye kau shangun ai mabyin mung jahkring hkring byin lai wa sai re.
Mung Hkawng, Manje mare ni de KIA ni sinat kaba gap bun ai majaw Mung shawa ni si hkala byin ai ngu shanhte a ntsa tsang de tang, teng mabyin n chye ai mungshawa ni hpe n teng n man shiga jaw shabra ai lam galaw ai. Shanhte madaw she Manje mare kata laknak kaba shadun nna KIA ni nga na zawn nawn ai shara shagu gap bun nga ma ai.
October (3) ya shani KIA Dap Dung (27) ginra, Laka mare Jawng Kawng hta shara jahkrat nga ai Hk.L.Y (86), Hk.M.Y (318) ni mung, Je Sawn, Lahtaw Bum, Hka U ginra ni de 81 mm hte hkrup mara gap ai lam galaw ai.
October (6) ya shani 8:15-8:35 ten hta, KIA Masat (21) Dap Dng kata Jan Mai Kawng post de Yaw Yung, Ta Lu Kung, Hkring mu dan, Beng wai ni hta dap jung nga ai Myen dap ni 81 mm hte kalang ta jawm gap ai lam galaw nna KIA ni shawng gap ai majaw gap ai re nga n teng n man shiga shabra nna, mara jaw jahte tam nga ai.
Ya na zawn, Myen hpyen dap ni KIA ni hpe mara jaw masu nna, Dung (1), Dung (2), Dung (27) ginra, Kaihtik Nam Hkam lam de shara la nna KIA ni a hkawm sa hkawm wa lam pat na hpyen masing she rai na re ngu maram lu ai.