October 5 ya shani, Hpakant Ginwang, Nam Maw kaw shanu nga ai Hpunau Sam Hkyeng Amyu Sha (Tai Lai), Lauban U Tun Lwin nta Lung Seng madun mayu ai nga nna sa wa ai marai (2), U Tun Lwin hpe sinat hte 5 lang gap kau da nna hprawng mat ai lam hpe na chye lu ai.
Mabyin gaw, shawngnan marai 4 shawng sa du nhtawm Slg. U Tun Lwin hpe Lung Seng madun mayu ai nga nna sa shaga ai raitim, U Tun Lwin n hkan ai majaw, cycle jawn nna marai 2 bai nhtang sa wa ai. Ndai marai 2, nta kata de shang wa nna U Tun Lwin hpe sinat hte 5 lang gap kau da ai majaw U Tun Lwin asak si sum mat ai.
Bai nna, October 6 ya shani hta mung Hpunggyi jawng kaw nna Madu Jan hte rau mawdaw jawn yu wa ai U Kan Set yan a mawdaw hpe marai 2 hkap jahkring nhtawm sinat hte hkap gap ai kaw nan U Kan Set asak si sum mat ai.
Ndai manghkang hte seng nna, Hpakant Balik Dap de Putma 302 hte amu hpaw tawn da nhtawm jep sagawn ai lam hpe galaw nga sai re. Slg. Tun Lwin hte U Kan Set yan gaw TNDP (Sam Hkyeng Amyu Sha Rawt Jat) pati hpung kaw na hpung shang masha mung rai nga ai.