Kachin Sub – State, Bang Gai hte Di Ma lapran na Hkatsu Zup kaw, 6 October 7:30am aten, KIA Masat (9) Dap Dung kata na hpyen hpung ni hte Myen asuya hpyen dap dapnu (99) kata na dap mying n chye ai hpyen hpung ni gasat poi byin ai lam na chye lu ai.
Bai nna, 3 October 10:00am daram hta Nam Shi mare kaw dap jung shara jahkrat nga ai Myen asuya hpyen hpung ni hte KIA Masat (34) Dap Dung kata na hpyen hpung ni gasat poi byin lai wa ai re.
Htingra Hkyet, Kyi La Pa, Bang Hkawng hte Loi Kang mare na mungshawa ni hpe, Myen asuya hpyen dap dapnu (99) kata na dap mying n chye ai hpyen hpung ni kawn, 5 October ya shani, n-gu hte malu masha ni, gun shangun na matu porter shaga ai lam mung, nga ai re.
Matut nna, KIA Masat (36) Dap Dung kata na hpyen hpung ni makawp maga nga ai ginra, Sau Swi Balawng Kahtawng kaw shanu nga ai mungshawa ni hpe, 29 September 11:30pm aten Myen hpyen dap Hk.L.Y (15) ni kaw nna mare masha ni pru prang hkawm ai lam tsep kawp n galaw na matu Ja Ja sadi jaw tawn da ai lam mung, nga lai wa sai re.
UPWC kaw na ningtau ningbaw, Hkringmang U Aung Min kaw nna NCA sen n htu shi ai Rawt Malan wuhpung ni hpe gasat gala ai lam n galaw ai nga nna, October 4 ya shani Rawt Malan wuhpung 7 hte NCA sen htu na matu n’htoi masat shagrin ai zuphpawng kaw tsun ai re. Myen asuya kaw nna Rawt Malan wuhpung 21 nga kaw na wuhpung 15 hpe sha NCA sen htu na matu saw shaga tawn ai kaw na wuhpung 7 gaw October 15 ya shani Nay Pyi Daw kaw NCA sen htu sana hku re.
Ngam ai Rawt Malan wuhpung ni gaw Myen Mung Munghpawm Amyu Sha Rawt Malan Wuhpung yawng shawnglawm yang she NCA sen htu na matu yaw shada tawn ai re. Myen Mung ting na Rawt Malan wuhpung yawng shawnglawm nna sen htu lu yang she NCA ngu tsun mai ai, nga nna Du Kaba Sumlut Gun Maw kawn Irrawaddy shiga dap a san htai lamang kaw tsun ai re.
Myen Mungdan a Ra lata poi du na n’htoi 30 daram sha ra nga sai raitim, Jinghpaw Mungdaw de Myen hpyen dap kaw nna gasat gala ai lam, hpyen n’gun shagreng ai lam ni gaw ding yang galaw nga ai re.