1.Ding hta Ga ntsa Amyu baw hpan law pra
Ngai Jinghpaw sa tai
Grai myit dik la nngai
Nye a ginra Buga
Wunpawng mungdan lamu ga
Amyusha, shaga ai ga
Tsun shaga ga, mung n bung
Labau masa mung shai mat
Dan hkung lak lai, shingni nga
Myit hkrum, htawng ka ka
Sai daw sai chyen ngai sari dung sari rawng
Wunpawng ginra dai
Malap kau lu na n rai.
2.Lai mat sai ten, marit shingran n zim
Myit kata hkam sha malap kau lu na n mai
Nye Buga grupyin
Maigan masha hkrai
Wunpawng Ga chyu Ga
Amyusha, shaga n sen
K’rai na, na sai kun?
Wunpawng Buga ndai
Yu chyai n law
Pyaw dik Ginra
Malap n lu
Kaning ma n di
Marit shingran mu
Ramma prat, gam maka
Nanghpam hta hkrat sum
Myit du dat shagu
Sawm rawm myi prwi pru sai oi…
Myit malai lu ra
Hkring nga n mai
Tsadan, ana, zingri
Kasat shamyit kau ra sai yaw.
3.Goi… Dai ni, nye mungdan
Grupyin de mada yu
Wunpawng Ramma hten za
Nanghpam lu sha sha
Katsi majan hta hkrat sum
Myit malai lu ra sai lu
Jinghpaw ma ya hkam sha ra
Maroi nni, masin n si
Garen gari, hkam mana ra
Ana zingri ndai
Mai tsai na gaw yak sa
Kaning di na, gam maka
Wunpawng Ramma yawng, myit malai ra sai yaw;
Mung masa, lam ndai
K’rai hkrai Garum
Makau grupyin, makawp maga
Myit hpaji masa
Ahkaw hkang n dut n dang
Myit mada, shingran mu
Lawt na aten ni
Lam shagu hta gaw sharawt
Lahkrip ra ra, rau jawm shakut
Makawp maga chye ra
Labau ngang grin na
Wunpawng lahpa ntsa, lit kaba nga
Jinghpaw Wunpawng ngai, myit dum ai yaw.
4.Karai hpe chye ai, Wunpawng myusha
Ja hkrai zawn zawn
Mungkan ntsa,
Hkum hkum tsup tsup
Myit hkum shayawm
K’rai makawp maga
Mungkan labau ndai
Wunpawng Hkanan de du
K’rai jaw ai atsam nan rai
Hpan da mada nga pra
Dinghta Ga ntsa
Amyu Baw sumhpa
Manu dan ai hkrai
Makawp maga saga lu oi…
Mung chying shawa
Myi hpaw na na
K’rai hpe tsaw
Shinggyim masha, mung tsaw myit myit
Ta tut gaw hkrit
Wunpawng sha, gam maka
Tsawm htap, gawng shingyan
Htenza mat wa
O…hpu nau ni
Myit malai lu, hpang hkrat mat na yaw;
Wunpawng shayi ngai
Ga shagawp laika ka
Arawng la nngai
Grai myit dik sai
K’rai a chyeju hpe shakawn nngai law.
Jinghpaw Wunpawng Ramma ni yawng ndai laika, atsawm sharai hti la mu yaw.
Ka ai wa,
Adwi Lum Naw
Mungshawa tsi rung wang
Du Mare, Lawk (2)
Myitkyina