Myitkyina – Manmaw Lam Hta Myen Asuya Hpyen Dap Sinat Laknak Htaw

Myitkyina – Manmaw lam Mali hka mahkrai pawt kaw shara jahkrat nga ai Myen Asuya hpyen dap Hk.M.Y (101) dap ni May (1) shani (1:00) aten sinat laknak htaw mawdaw lai wa ai lam chye lu ai.

Bazuka sinat lau (4), sinat pala sutdek (24) hte kaga hpyen arung arai ni htaw wa ai lam hpe mu ai buga masha ni tsun ai. Myitkyina – Manmaw lam dingyang hta mung Myen Asuya hpyen hpung ni shawoi na hta grau nna shim lam ni shagreng tawn ai lam mung Buga masha ni matut tsun ai.

Ya na zawn Myen Asuya hpyen hpung ni sinat laknak shagreng, Hpyen shim lam ni shagreng ai lam a majaw buga masha ni kawn kalang bai gasat gala majan kaba byin wa na hpe hkrit tsang nga ai lam chye lu ai.

May shata (1) ya shani kaw nna Wa Mung, Pansai (UWSA) Ginjaw shara hta Myen Mung Munghpawm amyu sha Rawt Malan Wuhpung ni hkrum zup bawngban hpawng galaw nga ai ten rai nga ai.