Sam Mung, Kawng Hka mare hta Mazut Roi Rip sat kau hkrum ai KBC Saranum yan a n’htoi (100) hpring myit dum akyu hpyi ai lam hpe April (29) jahpawt (8:00)am aten Laiza Muklum hta Ginjaw Amyu shayi Komiti ni kawn woi awn let Ginjaw Amyu shayi rung hta galaw ai lam chye lu ai.
Saranum yan a n’htoi (100) hpring myit dum akyu hpyi hpung hta mare Kanu Kawa, Ramma ni, Myu shayi Wuhpung ni hte Magam dap makan dap shagu na Myit su Salang ni sa du nna myit dum akyu hpyi shang lawm ai lam chye lu ai.
Saranum yan Mazut Roi Rip sat hkrum ai mang hkang hte seng nna mahkang npawt chye lu na matu galaw nga ding rai nga ai hta KBC kawn mang npawt jep sagawn ai ni kaw nna gaw mare masha ni hpe san jep galaw ai lam ngut kre ai daram ngut sai rai nna, Hpyen Dap maga san jep sagawn ai lam hta yak hkak ai lam naw nga ai lam chye lu ai.
Kadai Roi Rip sat kau da ai lam tup hkrak n chye lu shi ai raitim, Saranum yan Mazut Roi Rip sat hkrum ai ten Myen Asuya Hpyen Dap Hk.M.Y (503) Dap ni Dap jung shara jahkrat nga ai ten January (19) ya shana yup tung ten Roi Rip sat kau hkrum ai nga ai.