Myen Hpyen Dap, Dap Nu (66) Ni Mung Shawa Ni Hpe Jahkrit Shama

Hpakant Ginwang, Masat (6) Dap Dung Ginra, Awng Ba Le mare kaw Myen Asuya Hpyen Dap ni hte KIA Hpyen Hpung ni gasat gala byin ai ai a majaw Hpyen Koi Yen hkawm nga ai mare masha ni hpe mare de n htang wa na lam Myen Hpyen Dap ni kawn tsun ndau ai lam galaw ai lam chye lu ai.

Myen Asuya Hpyen Hpung ni kawn Awng Ba Le mare masha ni hpe mare de bai nhtang wa ra na nga nna tsun ai. Nhtang wa ai rai yang gaw ra ai arung arai malu masha hpa mung n karum sai nga nna Mungshawa ni hpe shagip shagyeng ai lam galaw ai.

Gin Si Seng Ra Nawku jawng hkan hpyen koi yen hkawm nga ai Awng Ba Le mare masha ni mare de nhtang mu nga nna Myen Asuya Hpyen Dap, Dap (66) hpyen hpung ni January (29) ya shani tsun ndau da ai. Mare de bai nhtang wa ai rai yang dum nta yawng wan nat kau ya na nga nna tsun jahkrit nga ai hpe chye lu ai.

Bai nna, January (29) ya shani Ma-U-Pin kawn Jan Mai Bum de Myen Asuya Hpyen Dap Hk.L.Y (80) ni laknak kaba hte shani tup gap dumbre sharu bun ai a majaw Loi Seng, Kahtan Yang mare masha ni grai hkrit tsang nga ai lam hpe Mungchying shisawk ni shiga jaw ai kaw na chye lu ai.

KBC Mu/Na/Kyit/Hkai dap kawn shana shabra ai shiga hta, “January 24-28, 2015 ya laman KMSS Director Fr. Noel Naw Lat hte staff ni, KBC ERC kaw na senior Program Manager Dr. Lahi La Hka hte staff ni yawng marai (41) gaw karum kahtau arung arai, lusha mawdaw kaba (6) hte Ginsi, Awng Ba Li hpyen yen ni hpe wa du karum da lu sai lam chye lu ai. Dai arung arai ni gaw n-gu buk (278), Sau Joi (512), Jum htuk (204), NFI Kit (200), Dignity kit (43) Hygiene kit (200) rai nna KMSS kaw nna karum ya ai re .”

Matut nna KBCMNK kawn, “Myen Hpyen Dap ni hku nna maw mawn ai lam gaw Ginsi mare na IDP ni hpe Aung Ba Le de lawan bai wa shangun mayu ai majaw re hku sawn maram lu ai lam Dr. Lahi La Hka tsun ai. Ya ten hta Ginsi mare kaw hpyen yen marai (1032), Kate maw Nawku jawng kaw marai (32) nga ma ai lam chye lu ai.”