Chiang Mai kaw NCCT-MPC Zuphpawng Galaw Nga

Daini bat hpang lahkawng ya shani hta, munghpawm myusha rawt malan hpung ni a NCCT hte Myen Asuya a MPC Salang ni Thai Mungdan Chiang Mai mare kaba hta bawngban hpawng galaw nga ai lam chye lu ai.
Lahkawng maga na Salang ni hku nna mungdan ting kasat gala jahkring lam (Nationwide Ceasefire Accord) hte seng nna madung bawngban nga ai re lam chye lu ai. MPC maga na kasa ni hku nna U Hla Maung Shwe, Dr. Min Zaw Oo, Dr. Ngun Chun Liang, U Tin Maung Than, U Nyo Ohn Myint ni shanglawm lai wa sai.
Lai wa sai Dec 30 ya shani kawn 14 lang ngu na NCCT malawm hpung ni a  zuphpawng hpe Chiang Mai mare kaba hta sha galaw hpang wa sai re. Ndai 14 lang na NCCT zuphpawng hta PSLF hte CNF hpung lahkawng na kasa ni lai wa sai Nov 19 shani na mabyin a majaw sa du shanglawm ai lam n nga ai hpe chye lu ai. NCCT malawm hpung ni kaw nna kasa mai 14 sa du ai hte bawngban hpawng hpe galaw nga ai lam mung matut chye lu ai.
Matut nna laknak lang rawt malan hpung (12) kawn hpaw shabawn da ai ‘Federal Union Army (FUA)’ a shawng nnan na zuphpawng hpe mung Thai-Myen Mungdan jarit hta galaw lai wa sai hpe chye lu ai. FUA gaw UNFC a mungmasa shakut shaja nga ai lam hpe madi wa daw tai nna karum na matu munghpawm myu sha rawt malan hpung ni jawm hpaw shabawn da ai re nga nna shanglawm ai Salang ni kawn tsun wa ai.
Thai Mungdan jarit shiga lawk kawn chye lu ai gaw ndai hpaw shabawn da ai FUA-Dingdung hpe KIA Dap Awn Daju Du Kaba Gam Shawng woi awn nna FUA-Dingda hpe gaw KNLA Tau Dap Awn Daju Baw Kyaw Heh kawn woi awn sa wa na re lam chye lu ai.

1 comments

Myen Mung gaw laknak jum ai ni bai up-hkang masa hpe tek jum wa ai rai yang, Mungkan hta hpang hkrat dik mungdan de du shang na gaw ga htum n shut rai nga ai. Dai hpe Pawng Jinghpaw sha ni chye la nna, tinang myusha lawt lam hpe myit mang hkrum let, lahkrip ra ra hte padang dip la lu na rai nga ai.

Comments are closed.