KLN Kachin
April 25, 2014 (Bat Manga Ya)
Sha Htum Ta, April 25 ya shani hta Wunpawng Amyu sha Ka-Ni Nanghpam Ninghkap Masat Ninghtoi Hpawng hpe Laiza Muklum kata Sinpraw Majoi Manau Wang, Munglai Hkyet Hpyen Dap, Hpyen Du Shalat Jawng, Mung Seng Yang Hpyen Sharin Shakyang Dap, Ja Htu Kawng Hpyen Dap, Je Yang hte Hpun Lum Yang Hpyen yen dabang ni hta jahpawt hkying 7:00am aten kawn hkying 11:30 ram du hkra galaw ai lam chye lu ai.
Je Yang Hpyen yen dabang hta Ndai hpawng hpe Daw (2) hku nna galaw ai lam chye lu ai. Daw (1) hta Je Yang Nawku Gawknu hta Karai Kasang kaw Wunpawng Ka-Ni Nanghpam Ninghkap Masat Ninghtoi hpawng ap akyu hpyi rai nna, Daw (2) hta gaw dabang de shara bai la rai Salang Kaba N’pun Tu Zau Awng kaw nna Laksan Ginjaw Ka-ni Nanghpam pat Jasan Komiti Ningbaw a “Wunpawng Ka-ni Nanghpam Ninghkap Masat Ninghtoi” mungga hpe hti len rai nna, KIO Hpyen yen Lit hkam Salang Kaba Labang Doi Pyi Sa kaw na, Wunpawng Ka-ni Nanghpam Ninghkap Masat Ninghtoi hpe madi shadaw ai mungga shaga ai lam chye lu ai.
Matut na Je Yang Hpyen yen kata na Kanu/Kawoi marai (3) hte Kahpu/Kawa marai (2) sak se hkam madi shadaw ai lam ni galaw rai Ka-ni nanghpam hpe gasat kau na ngu ai shawa n’sen ni marawn rai nhtawm, Rev Chin Le Zau Awng kaw nna akyu hpyi shaman let a ngwi apyaw sha galaw ngut lu sai hte Je Yang Hpyen yen dabang hta shang lawm ai shawa masha yawng marai (3019) tup re lam mung chye lu ga ai.