Hpakan ginra hta KIA hte Myen asuya hpyendap ni gasat poi byin

Guptung ta (8), 2012 ning October shata 22 (But) ya shana de hkying 6:00 PM daram hta Hpakan ginra, Chyau Kang hkahku maga, Wang bum mayan kaw KIA masat (6) dapdung hpyenhpung ni hte Myen asuya hpyendap, Magwe hkridun LID (88) npu na L.I.R (13) dap ni rau gasat poi byin ai lam chye lu ai.

Myen asuya kaw nna KIO uphkang ginra ni htim gasat ai lam n galaw ai nga nna grai tsun nga ai raitim, lawu Myen mung de dap jung ai dap ni hte Sagaing – Monywa hkridun, Sinna dingdung hpyen ginra daju (NW – RMC) npu hpyendap ni Jinghpaw Mung de grai htu lung shara la nga ai hpe chye lu ai.

Bai, Guptung ta (10), 2012 ning October shata 24 (Dam) ya shani hkying 2:30 PM ten daram hta Nawhpaw bum kaw shara la nga ai, Myen asuya hpyendap, Myitkyina hkridun, Dingdung hpyen ginra daju (N – RMC) npu, Mogaung – Samaw hkridun L.I.B (105) dap ni kaw nna, KIA ginjaw shimlam hpyenhpung ni shara la da ai, Padang kawng post hte Kang bum post ni de 81mm amyawk kaba (5) lang gapbun ai lam chye lu ai.

“Du na, 2012 ning October 30 ya shani Miwa mung, Ruili kaw KIO datkasa ni hte Myen asuya simsa lam datkasa ni hkrum bawngban sa wa na matu jahkrup nga ai ten hta ndai zawn, Myen asuya hpyendap ni kaw nna, KIO uphkang ginra ni de shang chyinglau hkawm ai lam grai law wa ai gaw, KIO hpe hpyen masa hku shadut shama ai lam rai na re” nga nna KIA masat (6) dapdung hpyendu langai tsun wa ai hpe chye lu ai.