KIA hte Myen asuya hpyendap ni gasat poi matut manoi byin nga

Guptung ta (9), 2012 ning October 23 (Chyanun) ya jahpawt daw hta KIA masat (27) dapdung ginra, Ulang Pa ginwang, Ulang Pa mare de htim shang wa ai, Myen asuya hpyendap, ka-ang hpyen ginra daju (C – RMC) npu, Mandalay –  Myingyan hkridun L.I.R (15) hpyenhpung ni hte KIA masat (27) dapdung kata na Mung Shawa Hpyenhpung (MHH) ni gasat poi byin ai lam chye lu ai. Matut nna shana daw hkying 2:00 PM ten daram hta KIA masat (27) dapdung up woi-awn ai hpyenhpung ni hte Myen asuya hpyendap L.I.R (15) hpyenhpung ni Ulang Pa ginwang, Maji Gung kaji hte Namsa mare lapran kaw gasat poi byin ai lam chye lu ai.

Ndai majan hta Myen asuya hpyenla marai 5 lahta si, hkalaq hkrum ai lam hpe KIA shawnglam shiga kawn chye lu ai. KIA kaw nna Myen asuya hpyenhpung a sinat laknak ni hte hpyen arung arai ni lu zing la ai lam mung matut chye lu ga ai.

Bai, Guptung ta (9), 2012 ning October 23 (Chyanun) ya shani KIO ginjaw ginra Nahpaw bum sinpraw maga hta Myen asuya hpyendap, Dingdung hpyen ginra daju (N – RMC) npu, Moguang – Samaw hkridun L.I.B (105) hpyenhpung hte KIA ginjaw shimlam kata na Mung Shawa Hpyenhpung (MHH) ni hte gasat poi byin ai lam mung chye lu ai.

Guptung ta (9), 2012 ning October 23 (Chyanun) ya shani hta sha Nmawk – Hkawanbang (Kyauk tsahkan) mare makau kaw KIA masat (16) dapdung ni hte Myen asuya hpyendap, Manmaw hkridun MOC – 21 npu na L.I.B (237) hpyenhpung ni hte gasat poi byin ai lam mung chye lu ga ai. Dai gasat poi hta Myen asuya hpyenla Cpt. langai hte rau marai (3) si hkrum ai lam buga shiga kawn na chye lu ai.

Guptung ta (9), 2012 ning October 23 (Chyanun) ya shani hta sha hkying 10:00 AM ten daram hta KIA masat (17) dapdung hpyenla ni hte Myen asuya hpyendap, Sinpraw dingdung hpyen ginra daju (NE – RMC) npu, Lahta sammung, Hupang kaw hkridun ai L.I.B (145) hpyenhpung ni Lahta sammung, Gangming hkran kaw gasat poi byin ai lam mung matut chye lu ga ai.

Bai, Guptung ta (9), 2012 ning October 23 (Chyanun) ya shani shana daw hkying 3:00 PM grup-yin ten hta Dawhpum-yang, Namwai hte Hpakke mare lapran kaw shang chyinglau hkawm nga ai, Myen asuya hpyendap, Dingdung hpyen ginra daju (N – RMC) npu, Dawhpum-yang kaw dapjung ai, L.I.B (142) dap ni hte gasat poi byin ai lam chye lu ga ai.

Myen Mung asuya Gumsan magam, Slg. Theing Seing kaw nna KIO uphkang ginra ni de Myen asuya hpyendap ni hpe htim gasat na aming jahkring da ai nga nna, tsun nga tim mung, KIO uphkang ginra kata hta KIA hte Myen asuya hpyendap ni gaw gasat gala ai lam ding-run naw rai nga ai. 2012 ning October (10) ya nhtoi hte Myen Mung simsa lam bawngban komiti, ningtau ningbaw Slg. Aung Min kaw nna KIO hpe simsa lam hkrum shaga na matu laika sa da ai laman hta ndai zawn Myen asuya hpyendap ni kaw nna, KIO uphkang ginra ni de Myen asuya hpyenhpung ni laja lana shamu shamawt chyinglau hkawm wa ai a majaw gasat poi ni matut manoi byin nga ai lam hpe mung chye lu nga ai.

Related posts

1 comments

Comments are closed.