Myen Asuya hpyendap ni hpyen-yen ginra de sinat kaba gap bun

Guptung ta praw (1), 2012 ning October shata 15 (But) ya shani hta KIA Padang sector hpyenhpung ni dap jung nga ai, Miwa jarit lahta shadaw masat (6) mayan de, Myen asuya hpyendap, Magwe hkrindun LID (88) npu na, Yenanchaung kaw dapjung nga ai LIB (77) ni gaw htim gasat shang wa ai lam chye lu ai.

Ndai zawn gasat poi byin nga ai ten hta, Miwa mung hkran maga de hpyen-yen koi rawng nga ai, hpyen-yen ginra de Myen asuya hpyendap ni gaw 81mm, Jak sinat kaba ni hte gap dumbre bun ai lam chye lu ai. Dai zawn Myen asuya hpyendap kaw nna, hpyen-yen ni nga ai ginra de sinat kaba gap dumbre bun ai majaw hpyen-yen ma kasha Shd. Bawm Hkaw (asak-4 ning) gaw lagaw hte lata hta hkala hkrum ai lam na chye lu ai.

Shd. Bawm Hkaw (asak-4 ning) gaw Myen asuya hpyendap ni a gap dumbre bun ai jak sinat kaba pala hkra hkrum ai majaw lapai lagaw dawq kau ra ai lam mung matut chye lu ga ai.