Bum Sumshi

Shanglawt Tsing

Sept 26, 2011 @ 3:00 AM

Daina dik hkra yup n pyaw,

Sam mung m’jan shiga majaw;

Kyu rawt hpyi tim yup n lu,

Majan pa de hkrai myit du;

Salum wan hkru nga sangai,

Myiprwisi gin-yan ayai;

Yup-ra bunghkum she madi,

Tai wa hpe masin nsi;

Dap dung 8 hte 9,

Yen kau ya ra sai da lu!

Tai wa hpyen hkying lam sa,

Laknak kaba htim lung wa;

Mung m’sha ni hpe n-gang dat,

Shani shana myawk n tat;

Sinpraw htingbu tinggyeng wa,

Shi a masing hten ai nga;

Anhte hpyen hpe wantsi dawk,

Gumhpraw shabawn jaw shamyawk;

Kadai hpaji jaw ai ta?

T’ra hkam tam na zawn ngu wa;

Matsan dum myit n rawng dam,

Shan a masing awng dang lam;

Dap Ba 4 de bai htim,

Shiga kahtet majing grim;

Hpabaw majan ngu na rai?

N tara majan ngu dik sai;

Tai gaw masing 2 gran,

Kalang kahtan 2 dan;

KIA hpe mung shamyit,

Sinpraw wa hte lam n-yit;

Lawhpa amyit m’rin majaw,

Dawdan wa ai lam n jaw;

Majan ndai n sim mai,

Abum sumshi hkru na tai;

Kadai garum lu na ta?

Hpan Karaiwa chyu sha nga;

Wunpawng sha ni htamshi grau,

K’rai Wa kaw hpyi jahtau;

Shat lusha law gam saga,

Daphkun she galwi magra;

Anhte matu laknak gaw,

Kyu hpyi lam sha rai sai law.