18 September 2011 (Majoi) ya shani hta Namhkam, Yangwu mare masha, Slg.Shauyang Naw ngu ai, Miwa amyu sha langai hpe Myen asuya, hpyendap LIB (144) hpyenhpung ni gaw Nmau hka (Shweli) wanjak sa lam kaw sinat gap bun ai lam chye lu ai.
Slg. Shauyang Naw gaw Nra Wa n-ga htaw dut sha ai wa rai nna, 18 September 2011 ya 3:00pm ten daram hta Nmau hka wanjak sa lam ntsa Loi-mare makau, Loi-hkyet mahkrai kaw htawlagyi modaw hka bang nga ai shaloi, Myen asuya, hpyendap LIB (144) na Tau Dapup(2ic) Major Win Htut Le woi-awn ai hpyenhpung ni du wa nna san jep hkrum ai lam chye lu ai.
Major Win Htut Le gaw Slg. Shauyang Naw hpe hpabaw amyu re ngu san ai shaloi, “Slg. Shauyang Naw gaw Lisu amyu re ngu htai ai hte, Kachin nga yang gaw nga nna,” sinat hte lahkawng lang gap ai majaw lahpa hte kan kaw pala hkra hkrum ai lam re hpe chye lu ai. Bai, san jep yu yang, Miwa amyu re majaw, kalang ta Muse tsi-rung de htaw sa ai lam hpe mung chye lu ga ai.
Ndai lam gaw Myen asuya kaw nna Munghpawm kade tsun kajai timmung, tatut hta, Kachin ni hpe shamyit kau mayu ai kraw lawang rawng nga ai hpe asan sha maram lu nga ga ai.
kalang mi Myen Kai Chyan du usa, slg. Aung Lin Htut tsun ga ai, Myen hpyen la ni a myit hta kaga amyu, Myen amyu hta lai, mahkra gaw hpyen re hku masat na matu recruit la ai ten kaw na dawk ya sai, nga ai.
Myen gaw KIA hpyen la i nga nsan ai, Kachin re i nga sha san ai. Kachin re nga jang kadai tim, num/la/ma, mahkra gaw shanhte a hpyen re hku sawn nga ai.
Kachin nrai tim, Myen sha nrai yang gaw kaga ni mahkra gaw shanhte a hpyen hku sawn ai. Dai gaw shanhte a ladat re.