Mare masha ni hpe Myen asuya, hpyendap ni mara kata rim zing-ri

Bumsen ginra

Waimaw, Shwe Nyaung Pin hkridun, Myen asuya hpyendap, LIR (321) ni gaw 16 September 2011(Hpan) ya shani hta Nmawk muklum lahta na Goi kahtawng mare masha ni hpe mara kata rim zing-ri ai lam chye lu ai. Myen asuya hpyendap, LIR (321) hpyen hpung ni gaw Goi kahtawng de shang wa nna, mare masha marai (12) hpe KIA ni hpe n-gun jaw ai ni re ngu mara hta nna, adup gyit zing-ri ai re lam chye lu ai.

Dai mare masha marai (12) hpe Myen asuya, hpyendap post nga ai, Sanggang ginra de lam woi shatai nna, gyit woi lung mat wa ai lam mung chye lu ai. Ya ten du hkra, dai mare masha ni hpe bai dat dat ya ai lam n nga ai hpe mung chye lu ga ai. Rim hkrum ai mare masha ni hta nta langai kaw nna sha Kawa hte kasha lawm ai dinghku ni mung lawm ai lam chye lu ai. Rim woi hkram mat wa ai ni 18 September 2011 (Majoi) shani hkying 11:00am ten du hkra dum nta de n du wa shi ai majaw “dum nta masha ni hte jinghku jing-yu ni grai myit-tsang nga ai” nga nna, Goi kahtawng mare salang langai tsun dan wa ai.

Rim woi mat wa hkrum ai marai (12)

1. Slg. Pausang Hpang Wa (asak 60 ning),

2. Shd. Pausang La Nu (asak 20 ning),

3. Slg. Labang La (asak 60 ning),

4. Shd. Labang Wan Sawk (asak 22 ning),

5. Shd. Dashi Mun Awng (asak 18 ning)

6. Shd. Dashi La (asak 15 ning),

7. Shd. Gawmaw Brang Seng (asak 21 ning),

8. Slg. Maran Yaw Htung (asak 55 ning),

9. Slg. Myit Hkai (asak 48 ning),

10. Shd. Damau Di (asak 19 ning),

11. Shd. Lahtaw Awng Ra (asak 17 ning),

12. Slg. Lazing Naw Htoi (32 ning)

1 comments

Majan ginra, majan byin nga ai mungdan gaw galoi mung lam shagu hta hpang hkrat wa ai, zingri hkrum ai mung lam shagu hku re. Sinat hte ndang jang, dang mai aikaga lam tam zingri chye ai gaw Myen a ladat hte hpyen a ladat re.
Jinghpaw mung kaw majan byin nga dingsa, jinghpaw wunpawng amyu sha ni lam shagu hta hpang hkrat nga na sha re.
dai majaw majan hpe mai byin yang gaw Myen a ginra kaw majan pa lu shabyin yang gaw yawng a matu kaja nga ai ngu mu lu nngai.

Comments are closed.