Myen Gum shem hpe shalau, shatsang, sharim, jahkrit shama, duhka jaw nga ai, uhpung uhpawng hte mying pru ai pati, mung masa ning hkring ni,hpaij chye ai,ning hkring ni ning hkap n-gun madun chye ai ni hte moi shanhte rim zin kau sai kai chya ning hkring ni hpe shapraw la masu nna dai ni yawng hpe masawp shanyem tawn ai,ladat,shi mani dik ai zai ladat zawn re ladat hte maga mi de hkrang shapraw masu ,bai shanhte hte grai n-gap ai [ WA-Mai La ]hpung ni hpe grin ai mung masa daw dan lu ai masa n-nga ai, simsa lam la ai lekmat masat htu ai,shagri kaji ai myu sha ni,kadawng kataw na pahkam hkam ai kam shut lam galaw ai,myen a ta masat lekmat htu ai gaw kade lang htu tim,hka kata na shing na zawn grin ai lam n-nga,.ndai zawn re masa mabyin hpe lai wa sai ten hta mung galaw lai wa sai alang lang re, Sutsu ai hte masing kaba law law jahkrat sai anhte lamu ga hpe loi jaw na nre,annau ni kawsi kretsi hkra ladat shaw na gasat na,mung shawa hte sai garan hkra galaw na gaw hpyen wa a ntsun ja rai nga ai. Anhte mung hkap gasat la taw nna gasat madang sha gaw nmai na sai,htim gasat ai de,grau na shaja mazut ai de yawng ra sai.
Myen dap jung htu taw ai shara ni de matut mahkai nlu hkra lu sha htaw wa htaw sa lam yawng dan di kau ra sai, myen du nga ai kaw kawsi kretsi hkra anhte mung galaw ra sai ngu mu mada ai law,hpyen wa htu bang wa jang hkap ja sha ai madang gaw myit marai n-gun share n-gun yawm shangun ai ningmu de gale nga ai,anhte mung sat na sat na de hprut hprut re de,[nga hkang na shutek] rai tim panglai rap di lu ai,annau ni a kraw kata hta hpa rawng nga ai kun?tengman ai myit masa gaw galoi mung awng dang na re,ding hpring jaw ai lam mung galoi mung hkrat sum na nre.
Mung dan shinggan de du nga ai tsaw ra dik ai mung tsaw myu tsaw hpu nau ni e, simsa ai shara lawt taw nga ai shara kaw nga nga saga ai grau nna nsim nsa bungli hta grau shakut ai the matut manoi Kanu mungdan de lu garum hkra naw dating shakut ga,naw n-gun dat ga,(yi hku wan ) ntai hkra arang naw bang ga law,anhte lu ai ja gum hpraw lap mi gaw annau ni a sai daw sai chyen ni law law akyu jaw ai hta n-ga myu sha yawng a matu manu daw dan nlu ai arang kaba nan rai nga ai.
Dai ni na ten annau ni shawoi na hta grau htam 3-4 jat nna shakut ra nga ga ai,masha ni deng mi hkawm yang annau ni deng masum hkawm ra nga sai,galaw nan galaw,bang nan bang,gap nan gap ra nga saga ai,myu sha yawng a matu labau jaw ai Sai ka ai hkrun lam nan rai sai,myu tsaw myit hpe shayawm nmai sai,ya jang ya jang yi ngam de rau myit hkrum ai the shamyit shakre ai majan de rawt sa ga law.
Galoi mung ning hkap gasat ga.
Hka len kaba a shawng
Mung shawa yawng a nsen kaba hpe madat nna,mung masa hpyen masa hpe hka len kaba a shawng e masing kaba langai,lahkam langai htawt lahkam tawn lu yang awng dang na gin lam kaba rai na re hte,Tai hpyen a pahkam masing hpe ning hkap dang kau lu na re.
Ji woi ji wa ni a dudaw sai hkaw hkam nna arang bang lai wa sai, annau ni a teng man ai yi ngam,teng ai padang hkrun lam gaw tsun ai ga hpe shangang shakang na matu laknak hte,shangang la ra saga ai,ya ndai ten, myen a lai wa sai shaning law law hta mung masa hpyen masa gin sup lai wa sai hpe mung, ja ja myit shachyaw dinglun yu,bai hpaw yu ra nga ga ai.
Lai wa sai 1988 ning a hpang de myen gum shem asuya gaw myo kaba de shamu shamawt ai shan hte hpe ning hkap ai mung masa galaw ai mying kaba ai mung masa la ni hte Democracy pati NLD hpung hpe rim shamyit ai ladat hpe galaw ai zawn maga mi de gaw,rawt malan hpung law law hpe galoi mung njaw yu ai ahkaw ahkang ni hpe ga hte jaw masu nna laknak simsa lam galaw ai, Tuk nrawng ai lapu zawn kya dik ai si manyi dik zawn anhte a magyi lapran de baw dungu gum bang masu nna mung masa hpyen masa amyet htuk lai wa sai zawn ya dai ni mung dai hte bung ai ladat bai lang nga ai, shanhte hpe ning hkap dik ai,NLD hte mung masa la ni hpe masawp shanyem ai mai hkrum ai lam ni hpe chyawm la ai hte nmai bawng hkrum ai hpe tawn kau matsin tawn nna rau rap daw hta mungdan a matu kaja ai, chyawm bawng ga nga awng san kaw hte mung masa la ni hpe shazim masu ai mungkan de htawng madun masu ai hte maga mi de gaw baw sang ni hpe kasu kabrawng nga shamyit ladat hpe bai jahkrat nga ai.
Lai wa sai ten shanhte a kata na (htawk lan ye-Mi)kai chyan hpung ni hpe ru nawng gawt shamyit sai tim, ya dai ni maga mi de dai ni hpe bai shaw asung jashaw nga ai gaw myen a sadi ndung ai pale palau myit hpe mu sa ga ai,ndai hpe myit sawn shachyaw nna mung masa hpyen masa lahkam hpe hka len a shawng kaw jahkrat tawn ra sai.
Lam mi de Nga mung nrai shu mung nrai re,hpat lawat palawn kaw n-gun shama tinang shat sha nna,chyasam wa a yi ngam hta shakut nga ai,tinang kashu kasha ni hpe gap sat mayu ai,myu kaba maw ru hta len nang nga ai,kanu a chyu pau kawa di mayu ai, kawa a shing lang dan di mayu ai mayam myit nmat shi ai,myen a shingnan hpyen na hpu shawng hpuba ni e,labau rum ai,kaji kawa hkring htawng rum ai htung hking ru sai,ga bung ai, rau manau nau ai tinang myu hpang de jan grai ndu shi yang lau bai wa marit.
Tai hpyen a dap shagu hpung shagu hta npawt kaw nna ndung hkyen nam mak lawhpa mayun kum hpa sha ai hkrai,Wa lang gale ai hkrai,shawng lam htu lung nga ai myen dap ni a hpang lam de dap sim pyi n-nga wa shoi chyum nga sai,maza kanu sha shakre taw nga sai, myen hpe n-gun kaba loi naw dat yang shakre la na sha rai sai,Dap nawng kaba uhpung kaba the yan hkawm na malai Jau gawng ladat zai ladat law law hte mare kaba de shanyi gasat yang grau masam sa na re ngu mu ai, bai laja lana byin yang she anhte myu sha hpyen yen tsin yam ni hpe maga mi de grau garum wa na re ngu mu ai.
Ning sin kaba grai ndu shi yang hka leng a shawng kaw tsap let,
Naw da ting ga, gasat ga.
Padang Hkrun Lam
Padang hkrun lam nga ai hte maren padang dip la lu ai de, Awmdawm ahkaw ahkang lu ai de,shimlum nga mu ngamai ai simsa ngwi pyaw ai de du lu hkra annau ni yawng jamjau du hka ai yawng hpe rau jawm hkam let,Tengman jaw ai Tara masing kata,jaw ai mung masa masing hta Myit masa zai ladat majan,shi htawn shabra ladat(Media)majan,Htung hking laili laika Ga hte, shingni(sumla hkrung-yu ngwi)majan,hpyen laknak hpai ai ladat yawng hte,tai hpyen Gum shem, hpe Baw ntu-lagaw nmai hkawm shamu hkra gasat shamyit kau lu yang chyu tengman ai awng padang lu la na rai nga ga ai.
Dai majaw laknak hte gasat ai zawn,hpyen wa law law hkrat sum machyi shamyit lu na matu myit masa majan zai ladat majan hpe grau n-gun dat yang awng dang lam grau lu mai nga ai,hpa majaw nga yang dai ni na mung shawa law malawng gaw myen a shagyip shagyem ai kata kaw shiga nsin kaup tawn ai kata kaw, anhte a Blog.Website kaw ka gaw mung shawa ni nmai yu nmai hti nga ai, dai zawn anhte myu sha ni a tengman ai shiga hpe na lu na grai yak ai,bai myen hpyen dap kata kaw mung, shada da nru nra re lam grai byin pru nga sai ten re,dai zawn re ten hta anhte a tengman ai mabyin shiga hpe na lu ai hti lu ai rai yang gaw padang hkrun lam majan gaw chying hkaw n-galu ai ten kadun hta padang dip la lu na re,masha law law hpe jai lang nra ai,jau gawng zai ladat hte myen hpe yup npyaw sha nmu hkra ten tup duhka jaw ai mung myen a hkra machyi dik ai lam kaba langai re. Myen gaw shiga shadam,masu magaw nna mung up sha ai myu re majaw,hpa mung tsun wa chyalu re, dai hpe anhte yawng gaw chye nga ga ai tim myen a shingwang kata na law malawng gaw myen gum shem a masu ai,tsun ai mau mwi hta len sha pyaw sha taw nga ai she law ai.
Dai zawn re kaw na mung shawa hpe jasu sharawt nna tengman ai de tsang chye hkra shadum shabra ra nga ga ai.
Democracy hpe ninghpai masu nna,madun sha nga ai galaw sha nga ai ni hpe mung anhte bawsang ni kachyi mi mung nmai kam ai. mung masa masing hta ningmu nbung tim myu kaba masa bawsang masa gaw langai sha re,nhkrum ai hpe tawn kau hkrum ai hpe chyawm galaw ga ngu ai ga manaw gaw bawsang ni hpe simsa lam tinang mung daw up hkang lam, bawsang ni hpyi ai jaw na nre ngu ai hpe madi madun ai zawn,awng san kaw hte myen Gum shem gaw ladat langai hta hkawm ai shara magup Awng san kaw hpe ning gang madun sha nga ai hpe yu nna mu gin sai.hka kata numhkaw hprwi sha rai nga ai,Jiwoi Jiwa ni a lamu ga hpe anhte nan tinang lagaw hte bai gabye di la ra sai.
Yak gaw yak na re ndai lang sha yawng chyawm yak shalai kau ai hte dating nna yi ngam naw shakre ga,shaning galu annau ni baw ntsa grawng ai wan n-ga mara ya ai,shaning galu hkam sha jin nna kapaw pru wa sai,nzim ai lwi hkrat lai nga sai myu tsaw myit hpe loi hte sha zim mat nna simsa lam tam na kun?awm dawm lu na padang hkrun lam majan de she yawng ga ngu mayu sai.
Annau ni a naw kaji ai Ma ni a myi man hpe yu azi yu nna, maroi n-ni masin n-si ga sat shamyit ga law…,ninghtoi mahka du ni sai.
Baren Numraw
Lahta na ningmu gaw laika ka ai wa a ningmu rai nna, kachinlandnews kaw nna matut htawn shana shabra ai lam sha re hpe chye na shangun mayu ga ai.