Laiza,Woichyai Bum Udang Shagrau akyu hpyi poi galaw

Woichyai Bum Udang

Laiza Muklum Catholic (RCM) Jau Ginwang kaw nna woi awn ai hte 2011 ning September 14 (Dam) ya jahpawt hkying 8:00 am aten hta Woichyai Udang Bum,Udang shagrau akyu hpyi lamang galaw ai lam chye lu ai. Laiza Jau Ginwang, Ginwang Up Jau Rev. Fr. Joseph Nbwi Naw hte Nam San Yang Jau Ginwang, Ginwang Up Rev. Fr. Jon. Sum-ngawng Sin Wa Du yan kaw nna Missa Hkungga nawng ya wa ai lam galaw ai.

Ndai Udang shagrau akyu hpyi lamang a yaw shada ai lam gaw, Padang Hkrun Lam Majan Masing lawan ai hku awngdang lu na hte Wunpawng Amyu Sha ni awmdawm shanglawt lawan lu wa na matu, KIO Ginjaw Komiti woiawn jasat sa wa ai Mung masa, Hpyen masa lam ni hta Karai Kasang shaman ya nna awng dang lu na matu, Ginjaw Komiti Salang ni hte rau Shanglawt Magam gun kaji kaba yawng sadi dung magrau grang hkamja ai shaman chyeju lu la na matu, Ya ten hta Hpyen Masa a majaw myit kaji garen hkrum nga ai Mungchying Mung shawa yawng hpe Karai Kasang makawp maga bausin ya na matu hte Jau Ginwang kata hta kaga ra mara a matu Akyu hpyi la ai re lam chye lu ai

Yesu pungkum Kawng de nni nkri hkam let, Udang hpai lung wa ai masat hku nna, Udang Saq-ra (14) tup hta Saq-ra langai hpang langai Akyu hpyi la nna lung mat wa ai lamang hpe galaw wa sai lam chye lu ai. Dai hta, Saq-ra (12) tup kaw KIO a padang hkrunlam majan masing lawan dik awngdang lu na matu madung akyu hpyi ai lam chye lu ai. Catholic (RCM) sape hpung masha ni  yawng marai (3000) jan sa du shanglawm wa sai lam chye lu ai.