Hpyen yen tsin-yam karum kahtau lamang Los Angeles kaw galaw

Majan laman e yakhkak jamjau nga ai myusha hpyen yen tsin-yam ni a matu karum alu hta ai lamang hpe 6019 Baldwin Ave, Temple city, California kaw Sept  11 ya shana 4pm kaw nna 9pm duhkra galaw lai wa ai hpe na chye lu ga ai.

Ndai lamang hpe Los Angeles kaw shanu nga ai Jinghpaw Wunpawng myu sha ni hte Kachin American Association (LA) kaw nna woi-awn ai hte Los Angeles kaw shanu nga ai munghpawn Myen mungdan mungchying sha ni mung shanglawm galaw sa wa ai re hpe chye lu ga ai. Hpunau Sam, Hkang, Myen, Miwa, Lahu, hte Rahkine myusha ni kaw nna mung tinang a htunghking buhpun sumli hte ka manawt ai lam hta shanglawm n-gun jaw lawm ma ai. Los Angeles kaw shanu nga ai Myen mungdan kaw nna kaga “democratic’ hpung ni law malawng mung sa du shanglawm lai wa masai.

Ndai zuphpawng hta hpyen-yen tsin-yam ni a lam ni hpe sumla hte madun dan rai nna California kaw nga ai kaga munghpawn myusha ni hpe mung Jinghpaw Wunpawng myusha ni a mayak ni hte rawt malan lam ni hpe grau chye na na matu lamang ni galaw lai wa sai. Sa du shanglawm ai shawa ni mung yawng myit mi alawm rai nna lamang ni hta shanglawm ma ai hte ja gumhpraw alu ni mung jaw bang ma ai. Ndai shana lu hta la ai laksan alu san san US $ 5434.00 re ai lam hpe mung chye lu ga ai.

Ndai lamang hta woi-awn ai kanu kana langai kaw nna mung Karai Kasang a chyeju jaw e lamang yawng hkrak sha lu galaw wa sai lam tsun dan ai. Bai kanu kana langai kaw nna mung shawng lam kaw shakut shaja nga ai hpyendu hpyenla ni yawng a matu tut e myit dum kyuhpyi nga ai hte hpyen-yen tsin-yam ni hpe ta tut karum nga ai myit su hpunau ni hpe chyeju dum ai lam hpe tsun karan gachyan lai wa sai.