KIA hte Myen Asuya Hpyendap ni gasat gala byin

31 August 2011(Dam) ya jahpawt hkying 9:00 am grup-yin hta Manmaw – Loije lam Sinlum bum kaw KIA hte Myen Asuya Hpyendap ni gaphkat ai lam chye lu ai. KIA, masat (3) dapba kata na Zai Ladat hpyenhpung ni Sinlum bum grup-yin ginra gawan hkawm nga ai ten Sinlum bum hta dapjung da ai, Myen Asuya Hpyendap post na ni rau hkrum katut nna, gaphkat ai lam re hpe chye lu ai. Ndai zawn gaphkat ai hta KIA hpyenla ni bawm hkam nna yen da ai shara de Myen Asuya Hpyenla ni hkannang ai majaw Myen Asuya Hpyenla ni marai (5) daram bawm hkala hkrum ai lam na chye lu ai.

Bai, Muse ginwang, Nam-um hte Shwe Pyi Tit lapran na Lungga mare makau kaw mung hkying 11:00 am daram hta KIA, masat (4) dapba kata na Zai Ladat hpyenhpung ni hte Myen Asuya  Hpyendap ni laja lana gaphkat ai lam hpe chye lu ga ai.