KIA masat (2) Dapba npu na masat (5) Dapdung ni hte Myen Hpyen Dap Hk.L.Y 141 ni 23 August 2011 ya shana maga hkying 5 ten daram kaw nna Shwegu ginwang, Pangdang mare hta majan byin nga ai lam chye lu ga ai.
Ndai Myen Hpyen Dap Hk.L.Y 141 gaw laiwa sai 2010 ning November shata hta Myen Hpyen Dap, Dingdung Hpyen Ginra Daju (M.P.Hk) na Hpyen Kaichyan (Ts.Y.Hp) G-1 rai nga ai Lt.Col. Tet Pung kaw nna shi du baw hte pahkam hkam ai ngu ga sadi rau lam galaw na hta shimlam gan la ya na matu jahkring mi nga nna, KIA hpyen ginra de sa du nga ai Myen Hpyen Dapdung rai nga ai.
Ndai ginra ni hta jahkring mi nga nna ya du hkra dawm ai lam n nga ai Myen Hpyen Dap ni a majaw KIA hte jahkring hkring gasat gala ai lam byin nga ai ginra re.
Bai KIA masat (4) Dapba npu na masat (2) Dapdung ni hte Myen Hpyen Dap, Sinpraw Dingdung Hpyen Ginra Daju (Y.M.Hk.) npu na Myen Hpyenla ni rau 24 August 2011 ya shana daw hkying 2:00 ten daram hta Namhpakka mare makau kaw minit 15:00 daram gasat gala ai lam chye lu ai. Dai majan hta Myen Hpyen Dap na hpyenla 2 si hkrum ai hte KIA kaw nna sinat lau 2 padang dip la lu ai lam shiga na chye lu ga ai.